"Оқуға құштар мектеп"

№74 жалпы орта білім беретін мектебінде "Оқуға құштар мектеп" жобасы аясында Қазақстанның Халық ақыны, сүйегіне сөз сіңген, қазақ айтыс өнерінде өз өрнегін қалыптастырып, сексенінші жылдары сөніп бара жатқан сөз өнерін қайта жандандырған ақтаңгер ақын Әселхан Қалыбековамен "Кітап - табысқа апарар дара жол" атты онлайн форматта әдеби кездесу өтті.

«Қозатын өлең десе делебесі,

мен ақын Ергөбектің немересі»,

деп ақын апамыз Әселхан Қалыбекова арғы тегінің тегін емес екенін жырына арқау етеді. Ергөбек өз заманында әлеуметтік қайшылықтарды жете жырлап, сол тақырыпта салалы сөз қалдырған сергек ойшыл ақын болған. Сол асылдың жұрнағы Әселхан Қалыбекова өзін тек суырып-салма айтыс ақыны ғана емес, жазба ақын ретінде де мойындатты.

От ауызды, орақ тілді ақынның айтыс өнеріне қосқан үлгі-өнегесі мол. Айтысқа қашанда адал ақын:

«Мен ауылда айтқан бір ауыз өлеңімді, ауданда айтқан жоқпын.

Ауданда айтқан бір ауыз өлеңімді Шымкентте айтқан жоқпын.

Облыста айтқанымды мен республикада айтқаным жоқ. Қасымызда Қадыр Мырзалиев жүрді. Қадырдың көзінше бір сөзіңді қайталап көрші?»,-деген екен.

Онлайн кездесу барысында оқушылар ақынға арнайы сұрақтар қойып толымды жауап алды. Кездесу соңында ақын сөз өнері мен айтыстың қыр-сырына тоқталды.